香港新浪網 MySinaBlog
« 上一篇 | 下一篇 »
black lab | 17th Jul 2010 | keep fit 日記 | (8577 Reads)
上個禮拜睇報紙,見到有關欣宜減肥嘅報導,睇得出佢有「減肥sense」,唔係亂咁減,而且有好多到point位,值得同大家分享吓。

【4個月減 25磅 欣宜高纖餐單曝光】 (摘自2010年07月09日蘋果日報)
今年 23歲嘅欣宜,減肥年資已經有 7年幾,當年 16歲嘅佢 226磅,肥到頸都睇唔到。肥姐為咗愛女健康,主動搵修身堂老闆張玉珊幫手,唔使一年欣宜由加大碼變成大碼(150磅),絕對係修身界奇蹟。
今年正值欣宜修身 7年之癢,眼見體重有回升跡象, 2月初佢再次的起心肝,搵修身堂營養師幫佢度餐單,再加上做纖體機同狂跳 Hip hop舞, 4個月就激減 25磅,由 140磅減到 115磅。依家欣宜面尖尖,全身贅肉唔見晒,呢個夏天仲不停以背心短裙示人。從未如此瘦過嘅佢話:「只要有恆心,鐵柱都係可以磨成針。」

到point位:
4個月減25磅,一啲都唔算激。因為根據醫生同營養師嘅指示,持續每個禮拜減到2磅就係最理想同埋減得健康。咁4個月落嚟,欣宜其實應該已經要減到32磅,佢算減得慢架喇!



今次欣宜除咗公開佢嘅營養餐單,更大講佢嘅飲食之道。佢話:「如果要出席慶功之類嘅飯局,我會準備一碗滾水,淥走啲油。我呢啲肥人食嘢係講抵唔抵食,抵唔抵唔係睇價錢,我 7年冇食過我最鍾意嘅椒鹽瀨尿蝦,因為一隻瀨尿蝦嘅卡路里足以令你放棄成餐飯。如果突然好想食朱古力,我會揀一塊黑朱古力,因為最唔肥。好多三唔識七嘅人走嚟問我點減,我會問佢係咪真係想減,我話有志者事竟成,好似我呢啲 size嘅人,只要有恆心,鐵柱都可以磨成針。我依家最滿意自己上半身,鎖骨同膊頭都好骨感,對腳係最難減,因為細個開始學芭蕾舞,肌肉好難收。冇人係完美架,我學識接受自己嘅全部。」

到point位:
用滾水淥走啲油,呢個方法既簡單又易做。有啲減肥方法無錯係好,但係唔方便。當一個方法一唔方便,就好易會做做吓放棄,減肥失敗嘅致命傷就係中途放棄!
去飯局,問侍應攞杯滾水,有幾難?
唔好話俾我聽咁做都麻煩。如果你咁覺得煩的話,應該都唔會減得成。



要減肥,排毒都好重要,欣宜話佢以前完全唔飲水,進行減肥療程後知道排出毒素身體好呢個原理,現時每日堅持飲 8杯水,「專家話每日三餐後都有得排便就最理想,但相信好難做到。依家我水不離身,如果一日都去唔到一次大便,我會狂灌水,等體內嘅便便可以盡快排出。我知道有人會選擇灌腸,但我真係接受唔到囉!」

欣宜有時會以燕麥片加豆奶做早餐,係就係寡啲,佢話:「我依家每餐都食得好開心,因為我知道自己食得健康,我享受食物,唔係單一為減肥。」

到point位:
冇錯!減肥節食其實都可以食得開心!邊個話減肥一定要食啲好難食嘅減肥餐? 都係嗰句: 減肥大忌係中途放棄。嗰啲淡茂茂嘅減肥餐,試問可以堅持幾多日?冇幾耐就會放棄、打回原形啦!咁咪導致失敗囉! 不過,燕麥片都要睇清楚營養成份,唔好誤信低脂就一定好,因為低脂嘅同時可能係高糖,咁一樣係死。記得要三低:低脂、低糖、低鹽 (最後呢樣唔關減肥事,不過關血壓事)。



高纖瘦身餐單
專為欣宜度餐單嘅修身堂營養師 Mylene表示,減肥一定要食得飽,而且要定時進食。呢個餐單最重要係均衡飲食,每餐都有澱粉、肉同埋蔬菜,含豐富營養同高纖維,保證飽肚。
(呢個 Mylene就係我以前讀營養控制嘅其中一個導師,好有料架!)

早餐 -
鮮莓高纖乳酪 (新鮮士多啤梨/藍莓+低脂乳酪+2湯匙燕麥)
午餐 -
田園雜菜雞肉卷 (用 pita bread包住青椒、紅椒+生菜+蘑菇+雞肉)
橙一個
小食 -
香蕉一隻 (晚上 6時)
晚餐 -
番茄雜菜營養湯 2碗連湯渣 (番茄+薯仔+西芹+牛展)

到point位:
1. 好多人以為減肥=捱餓,大錯特錯!減肥其實都要食得飽,但係唔係過飽。其實,無論減唔減肥,每餐都維持七成飽最就理想,再加每週兩、三次嘅30分鐘帶氧運動,咁就唔需要刻意去減肥架喇。
點解要食得飽呢?因為如果其中一餐刻意食唔飽,身體就會喺下一餐自動雙倍吸收,即使嗰餐只係食普通嘢都無補於事。
好多人以為減肥就唔食早餐,又係錯!因為唔食早餐的話,午餐所食嘅嘢就會俾身體雙倍吸收,而唔食早餐,好自然就會午餐食多啲,咁就死多二錢。
個重點係,食啲乜嘢去食飽呢?專家指出,每餐50~55%係澱粉質 (飯類)、30%係蔬菜、20~25%係肉類,呢個比例就最理想。

2. 又好多人以為減肥唔可以進食澱粉質,又係錯得離譜。雖然好多明星、藝人話自己戒澱粉質嚟減肥,仲話減到唔知幾多幾多磅咁。冇錯,戒澱粉質初期係減到磅,而原因就係因為身體水分嘅流失。之不過,呢啲所謂「繩頭小利」,其實幫助不大。因為飲番幾杯水,流失咗嘅水分就會返番嚟,體重就會回升。再者,減肥嘅大大大前提唔係減磅數,而係減脂肪。
實情係,啱啱相反。唔進食澱粉質食物的話,減肥係會事半功倍。
(a) 你諗吓,如果完全唔食飯,咁你點先會食得飽?好自然會食多啲餸啦!咁即係食多咗肉啦!但係肉類含有好多脂肪喎,咁即係變相吸收多咗脂肪,結果就係越減越肥。
其實重點係,唔係戒澱粉質,而係含澱粉質食物嘅烹調方法。炒飯、焗飯、汁撈飯,就死得啦!要食得健康,當然係蒸飯、白飯,如果嫌寡,可以蘸少少汁 ── 注意!係蘸,唔係淋晒落去。當然最好就走汁啦。
(b) 仲有,澱粉質係最快飽肚,而又最容易消耗嘅能量。快飽肚,即係意味唔會食過量;容易消耗,即係唔會儲存喺身體形成脂肪。
(c) 最最最重要一點係,冇澱粉質的話身體係burn唔到fat。如上文所講,減肥嘅精髓係減脂肪,冇減到脂肪的話減肥係meaningless。但係,燃燒脂肪嘅過程,身體係需要澱粉質作為燃料。咁如果戒澱粉質,又邊有燃料呢?



定時食三餐
上周六( 3日),欣宜向本刊公開她的減肥理念與方法,記者發現她真人比上鏡還要瘦。現時只有 115磅的欣宜,胃腩冇咗,手腳見得人,就連塊面都明顯瘦尖,難怪有人懷疑佢打 Botox瘦面。
欣宜今次再度的起心肝減肥,原因係為咗健康,「生命太珍貴喇,以前我好易攰、身體好差。由今年 2月到依家,我日日都跟營養餐單食嘢,唔使返工就會去學 Hip hop同做瑜伽,仲有做纖體機同睇中醫。我同營養師都有共識,減肥唔一定捱餓,每日都要定時食齊三餐。唔好以為唔食嘢就減到,因為當你食番嘢時就會雙倍吸收。我覺得最好少食多餐,揀啲有營養又唔會肥嘅食物。我以前係癡肥,減肥係我嘅終身職業,如果要我減得好辛苦,我諗我 keep唔到一世囉!以前減減吓反彈,係因為對自己太過嚴謹,唔俾自己偷食,結果成個人冇晒樂趣,一崩潰就喪食 keep唔到。」

到point位:
See?太辛苦以致keep唔得長久,的確係減肥失敗嘅最大原因。
我好認同減肥係終身事業。講得更加正確係:keep fit係終身事業。要將keep fit變成一個永久嘅習慣,同時要將唔好嘅飲食習慣糾正,而唔係set一個期限,過咗個期限就唔駛減唔駛戒口咁樣。
其實減肥都間中可以食吓獎勵吓自己,不過一定要有節制。所謂「間中」例如係一個月,又或者減過咗某個磅數就食一小包肥零食...之類。



早午餐調轉食
欣宜自今年 2月開始跟營養餐單進食,不過佢會自行作出改動,每餐大前提都係低鹽、低油、低脂,如午餐佢會改食西蘭花通粉,晚餐改食吞拿魚壽司。若果遲咗起身,欣宜會先食午餐,早餐會留待午餐時間先至食。營養師 Mylene表示,早午餐掉轉係因為午餐比早餐 heavy,而午餐與晚餐時間又比較接近,故起牀遲咗就先食午餐,俾身體有足夠時間消化食物。

到point位:
呢個方法有見地,應該幾有效,雖然我未試過。




最後送上「欣宜7年減肥歷程」,大家一齊見證佢點樣由16歲一個大肥妹,減到23歲開始見到鎖骨。欣宜,繼續努力!各位兄弟姊妹都要繼續努力!

[1]

有時看到瘦骨嶙峋的女孩也說要減肥,真是慘不忍睹。身型要適中,要健康才好看,不但是瘦就好。

現在的欣宜也挺不錯了。

ちなみに,你去年的減肥計畫怎麼樣?

Mr RiceBall
[引用] | 作者 Mr RiceBall | 25th Jul 2010 | [舉報垃圾留言]

[2] Re: Mr RiceBall
Mr RiceBall :
有時看到瘦骨嶙峋的女孩也說要減肥,真是慘不忍睹。身型要適中,要健康才好看,不但是瘦就好。
現在的欣宜也挺不錯了。
ちなみに,你去年的減肥計畫怎麼樣?

係啦!肥唔係問題,最重要係唔好論論盡盡,同埋肥得嚟唔健康。
減肥計畫仍然努力進行中,糖果零食食少咗好多,同埋盡量增取時間做運動。而家冇再繼續肥落去,不過距離我目標都仲有一段距離。

black lab
[引用] | 作者 black lab | 25th Jul 2010 | [舉報垃圾留言]

[3]

咁我寄大盒hi-chew俾你咪好衰仔囉?

HS
[引用] | 作者 HS | 26th Jul 2010 | [舉報垃圾留言]

[4]
金田一 :
我最唔鍾意啲人話食飯會肥,減肥就唔食飯。飯(包括麵等主食)係主糧,要食架嘛。少汁少油少零食已經幫唔少。其實每餐唔飲奶茶咖啡,改飲茶,又幫唔少。

你提出嘅兩個points觀點都正確。
啲人食飯食肥咗,都係因為食炒飯、焗飯,或者汁撈飯啫,又或者根本就係食過量。講到尾唔係飯本身嘅問題,而係烹調方法,或者飲食過量。

black lab
[引用] | 作者 black lab | 29th Jul 2010 | [舉報垃圾留言]

[5] Re: HS
HS :
咁我寄大盒hi-chew俾你咪好衰仔囉?

你咁即係玩自爆?
你寄大盒hi-chew俾我,唔代表我就要即時食晒佢架嘛!慢慢食、分啲俾人食,咪冇咁大影響囉。
btw,多謝你嘅hi-chew。

black lab
[引用] | 作者 black lab | 29th Jul 2010 | [舉報垃圾留言]